Pages

ഞാന്‍

My photo
Kannur, kerala, India
തിരൂര്‍ക്കാരി. കണ്ണൂരില്‍ താമസം. അധ്യാപിക

Friday, April 5, 2013

വിശ്വാസം .. അതല്ലേ എല്ലാം!

വർഷങ്ങൾക്കുമുമ്പ് ഒരു വിവാഹ വീട്ടിലെ വൈകുന്നേരം .വരൻ വധുവിനെയും കൂട്ടി വന്നെത്തുന്നതിനു എല്ലാവരും ആകാംക്ഷയോടെ കാത്തു നിൽക്കുന്ന സമയം . വധുവിന്റെ തൊലി നിറവും , അവളുടെ പട്ടുസാരിയുടെ പ്രൌഡിയും അണിഞ്ഞിരിക്കുന്ന പൊന്നിന്റെ തൂക്കവും നോക്കി അഭിപ്രായം പാസാക്കാൻ മിനക്കെട്ടു നിൽക്കുന്ന ജനക്കൂട്ടം. വരന് പിറകെ വാഹനത്തിൽ നിന്ന് പുറത്തിറങ്ങിയ വധുവിനെ കണ്ടവർക്ക് ഒരു നിമിഷം ശ്വാസം നിലച്ചു. പിന്നെ "അയ്യേ .... മാഷായിട്ട് ഇങ്ങനത്തെ പെണ്ണിനെയാ കിട്ടിയത് .......!!" എന്ന നിരാശ കലർന്ന ഒരു പ്രസ്താവന എവിടെനിന്നോ അന്തരീക്ഷത്തിലേക്ക് പടർന്നു . അത് കേട്ടു ഊറിവന്ന ചിരി അടക്കിക്കൊണ്ട്‌ വധു ഗൃഹപ്രവേശം നടത്തി .

പ്രസ്തുത വധു ഒരു വികലാംഗയോ വിരൂപയോ ആണെന്നു സംശയിക്കാൻ വരട്ടെ . അവൾ കാതിലും കഴുത്തിലും കൈത്തണ്ടയിലും ഒരു തരി പൊന്നുപോലും അണിഞ്ഞിരുന്നില്ല എന്നതാണ് ജനത്തെ അമ്പരപ്പിച്ച വസ്തുത . അങ്ങനെ ഒരു വിവാഹം അവർ ആദ്യമായി കാണുകയായിരുന്നു .


സംശയിക്കേണ്ട ,വധു ഈ ഞാൻ തന്നെ !

പെണ്ണായാൽ പൊന്നു വേണം എന്ന പൊതു ധാരണ തിരുത്തിക്കൊണ്ടാണ് ഞങ്ങൾ നാല് സഹോദരിമാരും ജീവിതം പിന്നിട്ടത് . വിവാഹ വേളയിലും ആ നിലപാടിൽ ഉറച്ചു നിന്നു . ആഭരണത്തിന്റെ തിളക്കമില്ലാതെ തന്നെ ജീവിത പങ്കാളികളെ നേടിയപ്പോൾ , എന്തിനും കുറ്റം കണ്ടെത്തുന്ന ജനം പറഞ്ഞു: "ലാഭം!"

ഇന്നും ഞങ്ങളുടെ ജീവിതത്തിൽ പൊന്ന് ഒരു ചമയ വസ്തുവല്ല. അതുകൊണ്ടാവാം വിവാഹ ശേഷം എൻറെ ജീവിത പങ്കാളിയുടെ 80 വയസ്സു കഴിഞ്ഞ അമ്മൂമ്മയുടെ ആഗ്രഹ പ്രകാരം ഒരു താലി കെട്ടിനു ശിരസ്സു കുനിച്ചു കൊടുക്കുമ്പോഴും , ആ വിശ്വാസത്തിനു കോട്ടം തട്ടിയതായി എനിക്കു തോന്നാതിരുന്നത് !


അല്ലെങ്കിലും , വിശ്വാസങ്ങൾ അങ്ങനെയാണല്ലോ ചിലപ്പോഴെല്ലാം നമ്മെ പരീക്ഷിക്കുന്നത് !!